أسرار الفوتوغرافية: رحلة من الهواة للحرفة مع هايدي أبو ليلة

آلاء خالد: أهلا بكم في حلقة جديدة من بودكاست VeraTalk. النهاردة معأنا ضيفة لذيذة وجميلة جدا، هتتبسطوا معأنا أوي في حلقة النهاردة عشان الحلقة كلها هتركز على التصوير بشكل عام، فرحبوا معايا بـ هايدي، ازيك عاملة إيه؟

هايدي أبو ليلة:الحمد لله، إزيك يا آلاء عاملة إيه؟

آلاء خالد: بصي هو في ناس ممكن متكونش عارفاكي؟ عرّفي نفسك للناس اللي بيسمعونا.

هايدي أبو ليلة: أنا هايدي أبو ليلة فوتوغرافر بقالي 7 سنين عمري 23 سنة، بشتغل من وأنا في أولى ثانوي، كان بالنسبة لي التصوير في الأول موهبة. أنا دلوقتي تخصصت في (Commercial Photography - التصوير التجاري أو الدعائي) بس بالنسبة لي في الأول بدأتها بورتريه وبعد كده بدأت عملي في التصوير نفسه، عرفت إن المجال نفسه أوسع من كده بكتير، والمصور الشاطر مش بيتعرف من إن هو ماسك كاميرا ويدوس على زرار وخلاص، لا لقيت التصوير توزيع light (الضوء) والlight هو اللي بيرسم الصورة مش بينور الصورة. فحبيت إن أنا أدخل مجال يظهر إن الفوتوجرافر شاطر فعلا عارف يصور، فدخلت في أصعب مجال. أنا أول حاجة بدأتها كانت تصوير النجوم، لقيت إن لو إحنا هنروح وندوس على زرار وخلاص، هي دراسة. ندرس كل حاجة علوم وليها أوقات معينة في السنة ووقت معين في الشهر وساعة معينة في اليوم وحاجات كده يعني هي دراسة فلقيت إن لأ يعني فعلا إن المصور علشان يطلع صورة وتكون ناجحة وتكون بيرفكت (بديعة) مية في المية، الموضوع مش مش اللي هي مومنت (اللحظة) على قد ما لأ هي فعلا دراسة. فأنا حبيت الصعب. يعني حبيت إن أنا أظهر فعلا إن أنا مصورة. خصوصا إنه مجال أنا فعلا حباه.

آلاء خالد: هو أنت كنت أساسا عايزة تخشي المجال ده من الاول؟

هايدي أبو ليلة: كان عندنا في البيت دايما والدي بيحب يظهر مواهب يعني بيحب نجرب الفنون برة في حاجات كتير على ما حد يظهر موهبة في حاجة معينة. فجربت حاجات كتير، ولعبنا كل أنواع الرياضة.

هايدي أبو ليلة: أنا ليا أخت توأم، درسنا في الأول رسم، هي عمقت في الرسم جدا وهي حاليا بترسم لوحة زيتية  وحاجات كده. أنا كنت بروح معاها نفس الكورسات. أنا كنت لسه بتعلم المناخير وهي كانت دخلت في الوش كله. هو الفكرة كلها إنك تستوعبي إن كل واحد فينا عنده موهبة بس هو يكتشفها. فمن ضمن الحاجات اللي كنت بحبها إن أنا أصور لحد ما كان معأنا كده كاميرا.

هايدي أبو ليلة: عارفة الكاميرات زمان اللي كنا بنجيبها عشان السفر والحاجات دي. لقيتني حابة الموضوع فعلا. هو أنا بحب أصور يعني أصلا ما كانش في بالي خالص إن إحنا ممكن إن أنا ممكن أعمق فيه كمان كشغل. حتة إن أنا اشتغل أصلا دي مش أوبشن، كان عندنا في البيت ده أوبشن أضاف بعد ما أنا حبيت الحاجه. يعني بدأت أقنعهم الأول ولقوا إن فعلا بدأت أطلع حاجات كويسة، فقاموا قايلين خلاص اشتغل.

آلاء خالد: طب فيه نوع تصوير بتحبي تصوريه؟

هايدي أبو ليلة: أنا أكتر حاجة بحبها طبعا تصوير النجوم يعني حاجة بحبها وبعملها for fun بس الحاجة اللي أنا مكملة فيها دلوقتي الكوميرشال إن أنا أصور برودكت  والحاجات دي.

آلاء خالد: ما أنا متابعكي  وملاحظة الموضوع ده يعني كل الحاجات بصراحة يعني ما شاء الله حاجات تحفة بجد.

هايدي أبو ليلة: تسلميلي بجد يا آلاء.

آلاء خالد: بالنسبة مثلا لما يكون عندك فوتوشوت جاي قريب بتجهزيلو إزاي؟

هايدي أبو ليلة:الأول بشوف الفوتوشوت ده معمول علشان إيه وهينزل امتى؟ صيف أو شتا وببدأ أعبر عنه خصوصا لو حاجة مثلا برودكت أو حاجة، فأنا لازم أعبر عن اللي أنا بصوره وأبدأ أدرس عنه وأسأل الكلينت كويس جدا. فدي أول حاجات أنا بدرسها وبعد كده ببدأ أشوف لون المنتج إيه، حجمه قد إيه علشان على أساسه هضبط  الlightيج وأضبط كل الحاجات دي.

آلاء خالد: بالنسبة بقى للمشاريع اللي بتصوريها طبعا أكيد يعني كل البروجيكت بيبقى ليه atmosphere معين، إيه اللي إنت بتعمليه عشان الشوت يكون جاهز؟

هايدي أبو ليلة: بصي أنا عمري ما بدأت شوت وأنا جاهزة خالص، يعني في شوت accessories أنا كنت عادي يعني. اتفاجئت وأنا بصور إني مش عارفة أصور لأني مكنتش جاهزة وفي حاجات ببقى مش جاهزة لها. بس برضو أنا كده كده بدي نفسي مساحة أسبوع بحيث إن أنا الأسبوع ده منامش يعني مفيش حاجة بجهز لها لأن كل حاجة محتاجة حاجة، والحاجة دي هتعرفيها وقت التصوير يعني لازم أنت تكوني مركزة أوي وقت التصوير. وتبدأي بقى تcreate الحاجة في التصوير نفسه.

آلاء خالد: حاجة حلوة يعني أنت متكونيش جاهزة يعني كل حاجة بتيجي في وقتها.

هايدي أبو ليلة: عمري في حياتي ما كنت جاهزة لحاجة أنا بصراحة بدأتها في اي حاجة.

آلاء خالد: لما بقى الشوت خلاص تكون خلصانة وكل الصور موجودة، إيه اللي أنت بتعمليه لما تخلصي الشوت. إيه اللي بتركزي عليه في editing؟

هايدي أبو ليلة: أنا أول حاجة ببدأ بيها إني بصلح الحاجات اللي أنا مش عارفة أعملها بيرفكت في التصوير. زي مثلا إني أفصل إضاءة الباك جراوند أو إني أغير شكل الباك جراوند. وبعد كده باخد التون المناسب مع الأيتم اللي أنا بصوره، مثلا في أيتم بينزل في الشتاء وفي بينزل في الصيف. لازم دايما أراعي في edit إن التون اللي بيتحط يكون مايل للcold لو هينزل في الشتاء ومايل للwarm لو هينزل في الصيف.  فدي من الحاجات اللي بركز عليها بعد التصوير.

آلاء خالد: هل حصل أن في شوت باظ منك خالص؟ الصور كلها باظت ومعرفتش تصلحيها فعدتي الشوت تاني من الأول؟

هايدي أبو ليلة: كتير بس أنا دايما مش عارفة في حد غيري كده ولا لأ. بس أنا مش بخلص الصورة وأدخل على اللي بعدها غير لما أخد الapproval من الكلينت. دايما بقول الأسبوع اللي أنا بصور فيه ده أسبوع لازم أنت تكون معايا فيه. أنا كده كده بصور عندي في البيت يعني الحاجة بتجي للبيت بس لازم يكون حاضر معايا الشوت كإنه موجود معايا. أخلص صورة ابعتها له أشوف إيه الغلط اللي فيها لو تمام هخش على اللي بعدها على طول. لكن أخلص شوت كامل وأبعته وكمان ميكنش باعت reference، هو  في مرة حصلتلي واتعلمت منها إني معملش كده تاني علشان مجهود الأسبوع ميطرش.

آلاء خالد: فلازم الواحد يبقى جاهز لأن كل شغل بيبقى فيه مشاكل يعني طبيعي يحصل. هل في فلediting process بتاعك default settings بتركيزي عليها ؟

هايدي أبو ليلة: بس أنا عمري ما استخدمتها ولا عمري هستخدمها لأن دايما بحب إن كل صورة لها تكة معينة وبتظهر برضه فجأة وأنا بصور، فاهمه قصدي؟ وأنا بعمل إيديت بردو ببقى مش حاسبة أنا هعمل إيه وقت edit نفسه. بشوف كده الصورة ناقصها إيه وابدأ اعمل كده بحب دايما أشتغل عليها مانيوال علشان تطلع مية في المية اللي هي حاجة مخصصة للصورة دي لكن settings جاهزة هو مفيش أسهل منه بس ممكن تظبط في صورة وممكن لأ. ده استسهال يعني واحنا دلوقتي بنبني اسم فاهمة؟ إني أستسهل وأنا لسه ببني اسم لا أنا كدة معملتش حاجه.كل صورة  بصورة.

آلاء خالد: بصي بقى أنا متابعاكِ وبحب حاجتك كلها. بحس كده إنك بتحبي تنزلي behind the scenes للشوتس بتاعتك. إيه أكتر شوت مكنش عاجبك خالص؟

هايدي أبو ليلة: شوت accessories طبعا ده أنا قايله في الريل ان ده شوت أنا مش مقتنعة بيه تمامًا. يعني حتى الآن أنا مكنتش متوقعة إن الشوت يطلع حلو بأمانة. لأن أنا بالنسبة لي كان عندي standard عالي أوي أنا معدتهوش فاهمة قصدي؟ يعني أنا قبل ما أبدأ الشغل بشوف reference على Pinterest ، بس أنا لما بشوف reference دايما مش بقلده بس باخد منه أفكار. فلقيت إن نفس الreference اللي أنا شفته مش عاجبني. فأنا كان عندي كده standard عايزة أعلي عنه. اتفاجئت في الشوت إني معرفتش أصور رغم إن ده أكتر شوت أنا تعبت فيه. يعني الشوتس اللي كانت قبل كده كانت تعب ذهني وتعب بدني أقل بكتير. وكنت بوصل كمان نتايج أحسن بكتير. إنما ده أكتر حاجة استهلكتني نفسيا وبدنيا. وبردو اللي أنا كنت حاسة إني مش هعرف أعملها بس الحمد لله عدت على خير والكلاينت فرحانة بالصور جدا. بس أنا كهايدي لا مش راضية عن الصور.

آلاء خالد: يعني أنت لازم تبقي راضية عن اللي أنت بتعمليه؟

هايدي أبو ليلة: اه ،على فكرة دي حاجة حلوة جدا. ماتكونيش راضية عن حاجة أنت بتعمليها علشان يبقى عندك أحسن.

آلاء خالد: كل المهن كده لازم تكوني راضية عشإني حابة الحاجة. فلو ما طلعتش كويسة خلاص يعني أنا إيه اللي أنا عملته طيب؟

هايدي أبو ليلة: يعني أنا مثلا مافيش أي شوت أنا عملته حسيت إن هو مية في المية، ودي حاجة أنا شايفاها فيا حلوة. لأن أنا دايما بحاول أوصل للمية من مية في حتة إن أنت تحاولي توصلي للمية من مية ، فده هيخليكي كل مرة تبقى أحسن من المرة اللي قبلها. لكن لو أنت خلاص شفتي نفسك كويسة في حاجة معينة على الأقل هتثبتي عليها فدي حاجة مش مطورش شخصيتي فاهمة قصدي؟

آلاء خالد: طب العكس بقى إيه أكتر شوت عجبك؟

هايدي أبو ليلة: كان في شوت المناسبة بتاعته إنه تم سنة. قدرت أفكر له صح. قعدت أفكر: طب أنا عايزة أثبت إن هو تم سنة وبطريقة غير مباشرة. إني أثبت مثلا في حاجة زي كده فيديو، الفيديو تقدري تعملي movement تعبري بيها عن حاجة زي كده، إنما الصورة هي صورة، صورة جماد، تعبري عن حاجة زي كده إزاي في صورة واحدة؟ فهنا بقى بدأ يجي في بالي إن أنا أروح محل سبوع وأجيب عربيات بيبي صغيرة أكني عاملة عيد ميلاد بالضبط وعملت له كيك وهكذا. فأنا عجبني إن أنا دخلت الافكار في الوقت اللي طلعته بالضبط. فأنا عجبني فيه أوي الفكرة بتاعته.

آلاء خالد: اشتغلتي outdoor شوت قبل كده؟

هايدي أبو ليلة: اه كتير أنا اصلا دي بدايتي.

آلاء خالد: الindoor يختلف عن الoutoor،  إيه اللي بتشوفيه مختلف؟

هايدي أبو ليلة: هو طبعا اول حاجة ان outdoor natural light إن الشمس هي متحكمة فيا مش أنا اللي متحكمة في الlight، وأنا بحب indoor أكتر لأن أنا بحب أنا أرسم الإضاءة في الصورة. أنا عارفة أنا عايزة أنور إيه في الصورة وإيه اللي أنا مش عايزة أنوره فده الاختلاف في التصوير نفسه. إنما الاختلاف بقى في التعامل وكده طبعا outdoor بتكلمي ناس أكتر. يعني أنا بالنسبة لي indoor تصويره أسهل يعني الlight تمام واحنا بنعرف نتحكم في الlight من الشمس. والحاجات دي أحسن من إني أcreate light. بس كتعامل وكأن إحنا نلتزم مثلا ميعاد وإحنا في مصر مفيش حد يلتزم بمواعيده أبدا. لأ أنا ما حبتش outdoor خالص.

هايدي أبو ليلة: ممكن نحتاج إن احنا نصور مثلا new collection في الشمس وهكذا ده عادي لكن يبقى شغلي كله أوت دور لا. أنا كملت تصوير commercial اللي هو أصلا معظمه indoor فأنا ظروفي اتحطت أصلا indoor ولما بفتكر إن أنا كنت بنزل أوت دور كل يوم وواخدة تان بدون أي سبب كانت بهدلة الصراحة.

آلاء خالد: والورش اللي أنت بتعمليها مثلا بتبقى في معظمها بيبقى أوت دور صح؟

هايدي أبو ليلة: اه، لو أوفلاين بيبقى في أيام عملي دايما. بس مؤخرًا ضفت يوم بيكون بالليل مش الصبح واحنا نـ create light ومرة بنصور natural light. فبقيت بعمل يومين عملي مش يوم واحد بس.

آلاء خالد: بما إنك في مجال التصوير بقالك سبع سنين إزاي عرفتي توازني بقى ما بين الجامعة والشغل في نفس الوقت؟

هايدي أبو ليلة: اه أنا بشتغل من وأنا في أولى ثانوي. بس الشغل اللي بجد كان في ثانوية عامة، وأنا في ثانوية عامة كنت عايزة  أدخل إعلام علشان كان فيها جزء تبع التصوير فدخلت أدبي وطبعا إعلام تقريبا وقتها 94% أو 95%، حاجة كده وكنت بحاول أوازن ما بين إني أشتغل وما بين إني أدرس كويس وأجيب مجموع حلو. وكنت وقتها ثانوية عامة. كنت عايزة أعمل upgrade للكاميرا من close frame لfull frame فكنت بحاول أحوش فلوس شغلي. فخلصت ثانوية عامة كنت محوشة تقريبا 10 آلاف جنيه أو حاجة كده. وخرجت من ثانوية عامة بمجموع 94%. قدمت في إعلام لحد ما المجموع نزل ما لحقتش إعلام على 0.5% أو 1%. وأنا من محافظة تانية، أنا من المنصورة، وإعلام في القاهرة فأنا كنت هنقل حياتي القاهرة. فطبعا كانت بالنسبة لي كارثة إني مروحتش الحاجة اللي أنا اصلا كل التعب ده عشانها، وإنها حاجة تبع التصوير اللي أنا بحبه لحد ما خلاص مفيش حاجة أدخلها غير حقوق english عندنا في المنصورة. والكلية دي جنب بيتي يعتبر بالظبط. وعلى حظي إن كمان مليش حضور. يعني أنا مش ملزمة أروح الكلية كل يوم. وسبحان الله كان ده أحسن تخطيط ربنا خططته لي. أنا مش عارفة لو كنت دخلت إعلام كنت هوصل لإيه لأن إعلام حضور وأنا في محافظة غير محافظتي كمان مذاكرة أربعة وعشرين ساعة في أربعة وعشرين ساعة ومجال مش تبعي التصوير اللي أنا كنت عايزاه اصلا. بعد ما أنا تعمقت في التصوير أكتر ففعلا أحسن حاجة حصلت لي إني دخلت حقوق english لأن أنا مش مضطرة أروح الكلية. أنا فعلا كنت بشوف الكلية بس أيام الامتحانات مش أكتر. لدرجة إن أنا كنت بنزل شغل قبل الامتحان ب 4 ساعات مثلا اللي هو أخلص الشغل قدامي ساعة يعني يا دوب أروح بيها الامتحان فكانت كلية سهلة وكان طبعا الامتحانات كلها mcq فده ساعدني أشتغل على نفسي أكتر في التصوير. يعني حتة إني ما دخلتش إعلام فدي حاجات تعطلني عن التصوير، لأ خالص.كده كده كنت هكمل حتى لو كانت حقوق دي كانت صعبة قد إيه. بس فعلا مش معنى إن في حاجة أنت كنت مخططها وراحت فده خلاص حلمك وقف، بالعكس خالص، أنا فعلا اللي حصل ده أحسن تخطيط حصل لي. أنا فاكرة إني قعدت فترة كبيرة مكتئبة إن إزاي ده يحصل بعد كل التعب ده. وإن حلمي بقى خلاص وقف. بس كده كده كنت حاطة في دماغي إني هكمل، هايدي كملي، وكملت والحمد لله كإني اكتشفت في تانية جامعة إن فعلا ده كان أحسن حاجة حصلت لي. أنا بقى كنت ماشية شغل إزاي مع الدراسة. أنا للأسف كنت مش بأخذ كورسات خالص. يعني كان المفروض في كورسات بناخدها وصحابي كانوا بيروحوا الجامعة كل يوم ولو مش بيروحوا الجامعة بيروحوا كورسات. أنا كنت بعيدة خالص عن الموضوع ده. كنت بس أسبوع كده قبل كل امتحان ألم في الدنيا على قد ما أقدر، اللي هو أهم حاجة مشلش مادة، أهم حاجة علشان يعني إيه مخسرش خاطر أهلي. إنما غير كده بحاول دايما أوازن إني أفرح أهلي إني نجحت وفي نفس الوقت يعني تكملي في شغلك في الحاجة اللي أنت هتكملي فيها فعلا لإني واخدة حق دي شهادة يعني حاجة لأن في ناس تقول لي أنت إزاي مش ناوية تشتغلي مثلا حاجة تبع حقوق لأن هو مش المجال أنا عايزاه خالص.

آلاء خالد: أنا عارفة اللي إن أنت بتفكري فيه عشان كنت كده في الأول أنا كنت دخلت مجال أصلا أنا مش حباه اللى هو يلا عشان نخلص وخلاص. بس بعدين لقيت إني حابة أعلم ليه مخشوش فدخلت.

هايدي أبو ليلة: أنت حابة التصوير أصلا؟

آلاء خالد: يعني أنا بحبه كهواية بس بروفيشنال مش اوي. بس يعني أنا بحب التصوير. يعني أكيد لو في حاجة إني أحسنها في التصوير بتاعي أكيد يعني مش هقول لا.

هايدي أبو ليلة: اه اه ربنا معاكي يرب ويوفقك.

آلاء خالد: أنت كمصورة هل شايفة أنا الفوتوغرافي في المستقبل بتاعه مع تطور التكنولوجيا والحاجات دي شايفة المستقبل بتاعه عامل إزاي؟

هايدي أبو ليلة: على حسب كل مجال لان التصوير برده هو بجد يعني مجال واسع بس ممكن أتكلم مثلا في مجالي أنا بس، هو في فوتوغرافرس بدأوا يخافوا ان هما يكملوا فيه لان دلوقتي الفيديو بقت هي الطاغية على السوشيال ميديا حتى أنا لما بعرف دلوقتي شغلي بعرضه على هيئة فيديو بشرح فيها شغلي وفي النص بعرض الصورة. في حاجة دلوقتي طلعت 3d والAi إن الناس دلوقتي بقت بتستسهل وتروح.

آلاء خالد: أنا قصدي على الموضوع ده.

هايدي أبو ليلة: أنا كنت عاملة ريل في الموضوع ده وهفضل متمسكة برأيي هي دلوقتي هي الناس داخلة فيها وبتشتغل فيها بفلوس أكتر علشان هي لسه تريند او هي لسه طالعة.

آلاء خالد:عشان الناس عايزاها.

هايدي أبو ليلة: اه عشان الناس عايزاها. لكن أنا متأكدة إن سواء بقى كنت عايشة ولا مش عايشة هييجي اليوم لأن الكلاينت عايز يشوف صورة حقيقية دلوقتي رايحة مطعم عايز يشوف المطعم ده بيقدم إيه؟ أنا عايز أشوفلك صورة حقيقية. ده أهم حاجة.

آلاء خالد: هل أنت شايفة إن التصوير في مصر واخد أهميته؟

هايدي أبو ليلة: لأ مش أوي. هو كده كده الي عايز يظهر نفسه هيظهر نفسه في أي مجال. بس التصوير حتى لما مثلا بنزل ريل لتصوير منيو المطعم. الناس مستغربة شوية يعني إيه فاهمة قصدي وإزاي ده بيتعمل؟ غير بقى مجالات تانية. في ناس كانت فاكرة إن تصوير النجوم ضغط الصورة بس وأنا كنت أولهم. فلا طلع إن تصوير النجوم ده حاجة ليها دراسة فمش فكرة مش واخد حقه على قد ما هو مش معروف قوي. بس مؤخرًا لأ يعني بدأ الموضوع يتعرف شوية. أنت دلوقتي في كل حاجة بتعملها الماركتينج أو علشان تجذبي الكلاينت، يا إما فيديوز يا إما صور، اه يعني بدأ الدنيا تنفتح شوية عن الأول كتير يعني.

آلاء خالد: بالنسبة للفن في مصر ككل ،شايفه الناس عارفة الفن في مصر؟

هايدي أبو ليلة: لأ طبعا. بصي هو الفن موجود حتة بقى ان أنت تعمقي تتعمق فيه وتبقي شاطرة فيه، دي بتاعتك يعني فاهمة قصدي؟ الفن في مصر صعب إنك تحققيه عن أي بلد تانية ولكن مش مستحيل. أنت اللي تفرضي نفسك على الحاجة، مش الحاجة اللي بتفرض نفسها عليك، أنت لو قصرتي بإن مصر ضعيفة شوية في الحتة دي هتفضلي واقفة مكانك، لكن أي حد بيشتغل على نفسه في أي مكان حتى لو في الصومال لأ هيعرف يوصل لحتة يعني فعلا كبيرة أوي. وفيه أمثلة كتير يعني. يعني في أمثلة كتير فعلا ناس عملت فن من مفيش. يعني كنا من سنتين بالظبط نسمع عن حاجة اسمها Food Blogger؟ أكيد لأ، بس أنت اللي تفرضي الحاجة على الناس وطول ما هي بتجيب نتيجة إيجابية خلاص يعني عمقي فيها.

آلاء خالد: يعني برضه من ناحية  jewelry والفاشون وكده، في ناس أصلا من برة بيلبسو حاجات مصري.

هايدي أبو ليلة: بالظبط اه.

آلاء خالد: في ناس كتيرة أوي بتسمعنا ممكن بتحب التصوير البروفيشنال وكده أنت ممكن تنصحيهم بإيه؟

هايدي أبو ليلة: مفيش حد بيبدأ بيرفكت خالص. أنا حتى الآن بصور في البيت معنديش استوديو، وأنا على فكرة ببقى مصممة أنزل الكواليس دايما بتاعة التصوير علشان أي فوتوجرافر يشوف الكواليس. هيلاقيني استخدم حاجات مش المفروض استخدمها أصلا، يعني المفروض أستخدم head فلاش. أنا عندي head وحد و2 speed light. فأي حد معاه المعدات دي هيقول لك لأ أنا مستحيل هطلع صورة زي اللي أنا مطلعها مثلا. هي الفكرة كلها إن أنت مش لازم خالص تبدأ ومعاك كل حاجة.  أنا أهم حاجة بالنسبة لي إن الحاجة اللي معايا أطلع بيها نتايج الناس اللي معاها المعدات الأكتر بيطلعوها بيها. معايا مثلا موبايل بحاول على قد ما أقدر أطلع من الموبايل ده صورة الناس تحتار هي بكاميرا ولا موبايل فاهمة قصدي؟ ان الحاجة اللي معايا يطلع بيها صور أحسن هي تطلعها ده دايما أنا ببقى إيه؟ بركز فيه مش بركز بقى أنا لأ في صورة معينة مش هعرف أطلعها غير لما يكون معايا حاجة معينة فقف على كده، لأ بعملها عادي.

آلاء خالد: يعني في ناس بتفتكر ان مثلا إني معايا تليفون وحش خلاص أنا مش هطلع صور كويس.

هايدي أبو ليلة: اه اه.

آلاء خالد: فالناس اللي بتبقى معاها التليفونات اكيد بتحب تصور.فإيه الsettings اللي ممكن الواحد يحطها في تليفون تخليها الديفولت في التليفون؟

هايدي أبو ليلة: مافيش خالص. مفيش. أنا عاملة اصلا كورسات موبايل علشان مفيش حاجة اسمها setting أنا همشي عليها خالص. هي الفكرة كلها أنت شوف أنت عايز تظهر إيه وابدأ اشتغل عليه كتكوين وقوانين وتوزيعات. وبعد كل ده ممكن أنت اتصورت صورة أنت مش يعني مش صح مية في المية كتكوين مثلا light فالحل ان أنت بتضيف حاجات في الedit. أنا عملت كورس mobile photography علشان حاجة زي كده. وفعلا في ناس حضرت معي ان كلهم معاهم تليفونات مختلفة فكنت مصممة كذا راوند من الروند offline أخلي اتنين، واحد معاه ايفون 13 برو ماكس وبنت معاها ايفون 6 اللي هي تقريبا دلوقتي أضعف موبايل فعلا تمسكيه خليتهم هما هم الاتنين يثبتوا light كويس أوي ويصوروا الصورة. بدأت بعد كده في الكورسات اللي بعد كده أخيرهم ما بين الصورتين من غير ما يعرفوا دي متصورة بإيه ودي متصورة بإيه، 90% قالوا إن الصورة بتاعت ال 6 أحلى بكتير. وبعد ما يعرفوا إن دي 13 بروماكس ودي ب6 6 اتصدموا اللي هو إزاي؟ هي مش بالكاميرا خالص، مش بالموبايل، هي الفكرة كلها أضبط التكوين وكل حاجة وصور.

آلاء خالد: اخر حاجة كده إيه الرسالة الأخيرة ممكن تحب تشاركها مع الناس؟

هايدي أبو ليلة: بصي أنا بدأت بجد لما ركزت مع نفسي أكتر على نفسي أنا هو أبقى هايدي تبقى أحسن النهاردة عن حياتي بتاعت امبارح. بقيت أطور أحسن بكتير من إني أقارن ده عنده كام سنة وصل لإيه؟ لما ركزت على نفسي أكتر ووصلت مرحلة أحسن ولسه حتى الآن مش راضية خالص عن اللي أنا وصلت له، أنا لسه في عندي حاجات أنا عايزة أعملها وبرضو أنا مركزة على نفسي بس مش هركز مين وصل لإيه ومين عمل إيه ومين سافر فين؟ كل الكلام ده فاهمة قصدي؟ فأنا بحاول قد ما أقدر أركز على نفسي بس وأشوف أنا عايزة إيه وابدأ إني اكمل عليه.

آلاء خالد: تطوري نفسك.

هايدي أبو ليلة: بالظبط اه، ودي فعلا أنا قعدت فترة في حياتي اللي هو كنت بروح استوديوهات أترجاهم يعلموني تصوير. من ست شهور كده لقيت الاستوديوهات دي بدأت تعمل لي فولو على انستجرام وصحاب الاستوديوهات اللي كنت بترجاهم بقوا يعتبروني زميلة ف اه أنا وصلت للحتة دي لما بطلت اعتمد على إني مش هعرف ابقى شاطرة في التصوير غير لما واحد يكون كبير قوي في المجال يعلمني، لأ ركزت على نفسي أكتر واشتغلت على نفسي أكتر بيني وبين نفسي. وفجأة لقيت المنظر ده رغم إني مستغربة إزاي. في يوم طلعت فيه أصور كان تصوير وكان التيم كله اللي طالع كلهم مصورين. أنا طبعا كنت لسه beginner بقول ما أنا عارفة كل المصورين الكبار دول طبعا محدش فيهم يعرفني أو حتى شافني. فكانوا بالنسبة لي حاجة يعني اتصورت معاهم معهم كلهم اليوم ده. النهاردة كلهم بيطلبوا مني أعمل معاهم ريل.

آلاء خالد: عملت لنفسك اسم.

هايدي أبو ليلة: عملت لنفسي اسم. وهم حتى الآن ما يعرفوش إني كنت في يوم من الايام متبعاهم. هم دلوقتي هم اللي متابعيني. فأنا فجأة لقيت ده فجأة الحمد لله.

آلاء خالد: يعني الحمد لله أنت طورت من نفسك بقيتي أحسن.

هايدي أبو ليلة: وكمان غير كل ده أنا اه بزعل بس ده كله بسبب ده توفيق ربنا. فالحمد لله.

آلاء خالد: يعني أنا بالنسبة لي مثلا أنا ساعات بطلع صور وحشة ساعات حلوة محدش هيكدب في الحاجات دي. بس يعني أنا إزاي أحفز نفسي أكتر؟

هايدي أبو ليلة: ان أنت متبصيش لبعيد أوي يعني ما تحسيش إنك قدامك مشوار طويل أو تحس إنك قدامك مشوار طويل أوي هتقف في مكانك، يعني مثلا اه اللي بيروحوا الجيم مثلا مفيش حد هيقول لك أنا عايز بكرة يبقى عندي six packs. لا هي مجرد ما أنت تحسي إنك النهاردة عملت اللي عليكِ دي حاجة تريحك نفسيا جدا. يعني مثلا أنا دلوقتي رحت مكان، المكان ده أقدر أطلع منه بأي صورة. دايما بحب استغل كل الأماكن اللي أنا مثلا بروحها خروجة مع صحابي، أحب دايما أصور الطبق اللي أنا مثلا باكله طول ما أنا في مكان استغل اي حاجة فيه في مجالي فهي حتة استغلال لكل ظرف أنت بتتحطي فيه. على الأقل أنت النهاردة لما تنامي تحسي ان أنت عملتي حاجة step by step هتلاقيكي وصلتي لحاجة فجأة من غير حتى ما تركزي. لأن أنت كده كده أصلا أنت عايشة اليوم بيومه، أهم حاجة إنك تركزي على إنك تعملي حاجة كويسة، عارفة لو بس لقدام قوي مش تعملي حاجة النهاردة يعني أنا بصراحة بحسها كده بس.

آلاء خالد: اتبسطت اوي إنك في الحلقة معانا النهاردة.

هايدي أبو ليلة: وأنا كمان والله بجد يا آلاء.

آلاء خالد: أنت شخصية لذيذة قوي بصراحة يعني.

هايدي أبو ليلة: ربنا يخليكي والله.

آلاء خالد: شكرا جدا وشكرا ان أنتم تابعتم الحلقة بتاعت النهاردة. وما تنسوش تتابعوني على الانستجرام  @veracityofart عشان يوصلكم كل جديد.

باي باي